Во црквите во Битола денеска се вршеше опевање на мртвите за Задушница, но се спроведуваа и мерки за ред и заштита на верниците од коронавирус. Во дел од храмовите беа поставени редари, кои ги упатуваа присутните на кое место да застанат и да ги постават пченицата, виното и лебот, притоа запазувајќи да има дистанца од еден до друг по метар и пол до два.

Во црквите имаше повеќе свештеници, па за обредот не се чекаше долго. Воедно и верниците беа со маски, ретки беа оние што ги туркаа за да целиваат икони. Повеќето оставаа пари пред иконите и се прекрстуваа. Ред имаше и при палењето свеќите, зашто и самите верници внимаваа да се на одредена дистанца.

Полицијата од рано утрово ги обезбедува приодите до Светонеделските и Буковските гробишта во Битола, не дозволувајќи им на верниците да вршат опевање по гробните места или посета по обредот во цркавата.

Во тек е тридневен полициски час за продолжениот викенд, целосен во Скопје, Куманово, Тетово и Штип, а делумен, секој ден од 16 до 5 часот, во остатокот од земјата, со забрана за одење на гробишта на целата територија на земјата.

Изминатите години, за Задушница и Духовден во повеќето храмови во Битола имаше голема посетеност од верниците и метеж, а на патот до гробиштата редовно интервенираше и полицијата за да воспостави ред.

Ж. ЗДРАВКОВСКА