Триесетина средношколци од Јане Сандански од Струмица го чистеа патот кон Цареви кули од ѓубре фрлен од несовесни граѓани и рекреативци кои пешачеле. Учениците акцијата ја почнале од излезот над градот кон локалитетот Двата пата и успеале да соберат повеќе стотина килограми разновиден отпад но најмногу пластика и стаклени шишиња фрлени од несовесни граѓани.

„Собравме околу над 30-тина вреќи отпад. Освен стаклена и пластична амбалажа имаше и фрлена покуќнина од скршени столови, фотелји, кревети и тоа покрај патен правец кој го користат не само рекреативци туку и гости кои сакат да го посетат археолошко-историскиот локалитет Цареви Кули. Се надеваме дека со нашата акција ќе ги предизвикаме и останатите, но и ќе ја пробудиме свеста за поздрава животна средина“, ни изјави Атанас Цикарски професор во СОУ „Јане Сандански“ кој се надева дека на исчистените локации ќе бидат поставени едукативни табли за чиста средина.

Чистењето на ѓубрето се вклопува и во акцијата што ја спроведува струмички „Комуналец“ со општината насловена како „Еко фронт, чиста да ни е“ со која во изминатиот месец беа исчистени сите диви депонии во општина Струмица а беа уредени и сите јавни зелени површини по населените места при што се засадени стотина дрвца. Во овој период зачестија и инспекциските контроли при што девет лица заработија казни за фрлање отпад на јавни површини.

В. ТРАЈКОВ