ТРИ МЕДИЦИНСКИ СЕСТРИ ВО СТРУМИЧКАТА БОЛНИЦА ПОЗИТИВНИ, ДИРЕКТОРОТ БАРА ПЕРСОНАЛ ОД ДРУГИТЕ ГРАДОВИ

    ТРИ МЕДИЦИНСКИ СЕСТРИ ВО СТРУМИЧКАТА БОЛНИЦА ПОЗИТИВНИ, ДИРЕКТОРОТ БАРА ПЕРСОНАЛ ОД ДРУГИТЕ ГРАДОВИНа инфективното одделение во Струмица хоспитализирани се 20 пациенти додека на дневниот ковид центар 13 лица кои се со полесна клиничка слика. (Фото: СДК.МК)

    Нови три медицински сестри од струмичката болница се позитивни на ковид-19. Станува збор за персонал кој работеше во новоотворениот ковид центар заради што струмичката болница ангажираше сестри од другите одделенија каде исто така заради обемот на работа недостасува персонал. Директорот Гогов вели дека состојбата станува алармантна пред сè заради големите дневни бројки на ковид дијаностицирани и лица кои бараат болничко лекување.

    „За да функционира новоотворениот ковид центар ангажираме сестри од други одделенија. Но и таму е зголемен обемот на работа така што ни недостасува персонал. До Министерството за здравство испративме барање за одобрување на дополнителен персонал во Струмица односно доктори и медицински сестри да бидат регрутирани од други градови за овде да работат оти ни требат во овој период“ вели Гогов кој минатата недела откри дека вирусот бил дијагностициран кај 5 здравствени работници од болницата.

    На инфективното одделение во Струмица хоспитализирани се 20 пациенти додека на дневниот ковид центар 13 лица кои се со полесна клиничка слика. Заради секојдневните двоцифрени бројки на новозаболени ќе се адаптира уште една просторија од поранешниот амбулантски оддел.

    „Имајќи предвид дека се зголемува потребата од пружање помош, наскоро ортопедската и гинеколошката амбуланта ќе бидат пренаменети за ковид пациент. Засега адаптираме соба со 6 кревети која ќе биде дел од новоотворениот ковид центар“, вели Гогов.

    Струмица последниве два дена забележа 66 нови позитивни . Досега се регистрирани 503 лица со ковид-19 а во моментов има 303 активни случаи претежно на возраст од 30 до 80 години. Од почетокот на епидемијата во струмичко од компликации од коронавирусот починаа 16 лица.

    В. ТРАЈКОВ

     

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира