Поради трагичната сообраќајна несреќа во која загинаа три медицински лица на магистралниот пат Битола- Прилеп, утрешниот ден, 4 октомври, Општина Прилеп ќе го прогласи за Ден на жалост. Оваа одлука е донесена на вечерашната вонредна седница на Советот на Општина Прилеп.
Во сообраќајката која денес се случи нешто пред осум часот загинаа прим. д-р Александар Ристески, радиолог, специјалист гинеколог д-р Никола Василески и радиолошкиот технолог Фанче Јованоска, сите од Прилеп. Утрово тие патувале кон Болницата „Плодност“ во Битола. Со соодветен комеморативен настан, Болница „Плодност“ ќе им оддаде почит на трагично загинатите колеги.
Според првичните сознанија, до несреќата дошло при судар на патничко возило „тојота“ со прилепски регистарски ознаки и товарно возило „волво“ со скопски ознаки. Причините за несреќата се утврдуваат.
Јавниот обвинител издаде наредба за обдукција на телото на починатите, сите патници во автомобилот, како и за испитување на примероци од крв и урина од возачот на камионот.
Наредено е и сообраќајно-техничко вештачење за утврдување на причините за несреќата.
Ж. ЗДРАВКОВСКА
