Орце Ѓорѓиевски денеска ја презеде градоначалничката функција во Град Скопје од Данела Арсовска. Тој на примопредавањето ѝ донесе букет цвеќе и рече дека средбата со Арсовска, која траеше околу 45 минути, била протоколарна.

Веднаш по преземањето на функцијата даде налог да се отстранат рампите за влез во бараките на Градот, велејќи дека сега тој ќе биде отворен за граѓаните. Најави дека вечерва во 20:30 часот почнува 72-часовното чистење на градот. Ќе биде вклучена механизацијата на ЈП „Комунална хигиена”, но и камиони од другите градови. Рече дека покрај чистењето, ќе се мијат и улиците.

Најави дека во наредните денови ќе има средба со приватните превозници за да се вклучат 60 автобуси во јавниот превоз.

Како приоритетни капитални проекти ги најави клучката кај Момин Поток, проширувањето на улицата Борис Трајковски во булевар и доградбата на мостовите во Карпош 4 и Аеродром, проекти кои беа почнати во времето на ексградоначалникот Петре Шилегов, а во мандатот на Арсовска беа во застој.

А. АНТЕВСКА