Во текот на една година, во Охрид од градскиот водовод се крадат околу три милиони кубни метри вода, чија вредност изнесува околу три милиони евра. За толкав износ оштетен е буџетот на „Про-аква”.
„До ноември 2017 година, кога јас дојдов на чело на ‘Про-аква‘, имаше преку 72% загуба на техничка вода. За нецела година тоа го намаливме на 64%. Ние аплициравме за еден проект во износ од 7,5 милиони денари, со цел оваа загуба да се намали уште повеќе. Министерството за животна средина веќе ни одобри 2 милиона денари. Со тие средства сакаме да воведеме контролни и регулациони шахти, а ќе воведеме и електронски броила со далечинско читање. Тие броила имаат вграден аларм и многу предности за нас и за потрошувачот. Доколку, на пример, кај некој потрошувач континуирано тече водо, а тој не знае за тоа, ние добиваме сигнал од броилото и веднаш го известуваме неговиот сопственик дека има проблем. Познато е дека само едно неисправно казанче за вода во текот на еден месец може да потроши и до 30 кубни метри вода”, ни изјави директорот на „Про-аква”, Владимир Алексиоски.
Во текот на летото, поради зголемениот број на порошувачи, низ градскиот водовод течат околу 500 литри вода во секунда, а на зима од 220 до 250 литри. Во шпицот на сезоната, во градот има во просек околу 30.000 гости.
Д. ЧУБРИЌ
