Опасноста од неексплодирани средства сѐ уште демнее во Тетовскиот Регион. Во нивите, покрај патиштата, а честопати и во домовите може да се најдат рачни бомби, мини, проектили од рачни фрлачи и други средства. Дел од нив се од војните кои се воделе во минатото, дел се останати од конфликтот од 2001 година. Поради ова, Дирекцијата за заштита и спасување, во соработка со СВР Тетово и Факултетот за безбедност од Скопје, одржаа едукативна акција за запознавање на граѓаните со опасноста од неексплодирани средства.
„Во Тетовскиот Регион во просек пронаоѓаме и отстрануваме 10 неексплодирани средства месечно. Најчесто тоа се рачни бомби, гранати, проектили од рачни фрлачи. Во 2019 собравме преку 20.000 куршуми. Овие средства најчесто ги наоѓаме во ниви и покрај патишта, каде што граѓаните најчесто ги оставаат. За среќа, досега немаме забележано некој да е повреден или да настрада“, вели Ариф Арифи, раководител во Дирекцијата за заштита и спасување во Тетово.
Во едукативниот материјал што им се делеше на минувачите е објаснето како да се постапува кога ќе се наиде на неексплодирани средства.
„Ако некој од граѓаните има сознание за неексплодирани сердства, веднаш треба да пријави во Дирекцијата за заштита и спасување. Сакам посебно да напоменам дека пријавувачот нема да има никакви последици поради тоа, односно против него нема да се поднесуваат пријави, дури и ако овие средства се наоѓаат во неговиот дом“, додава Арифи.
Едукацијата на населението е важен сегмент во отстранувањето на неексплодираните средства, а оваа активност е дел од меѓународен проект, во кој се вклучени универзитети и центри за истражување од Македонија, БиХ и Грција.
„Се работи за двегодишен проект, спонзориран од Програмата за мир и безбедност на НАТО. На територијата на Солунскиот фронт од Првата светска војна има останато голем број гранати, но тие можат да се најдат насекаде, па и во Тетовскиот Регион“, изјави Александар Иванов, професор на Факултетот за безбедност во Скопје.
З. АНДОНОВ
