Лозарите од Тиквешијата се мачат да најдат аргати за берба на грозјето која започнува за помалку од еден месец. Лозарите предупредуваат дека е можно грозјето да остане по полињата, оти ќе нема кој да го бере.

„Аргати не можеме да најдеме. Времето на бербата е кратко, еден месец, а работата сила е толкава. Каде попрво да се ангажираат?“, велат лозарите.

Предлогот од откупувачите, како можно решение, да се донесат работници од Албанија, за нив е неприфатлив.

„Тие луѓе треба некаде да спијат. Ние не сме големи производители за да си дозволиме и да плаќаме сместување. Ни требат десетина аргати, не стотина. Нема преноќишта каде да ги сместиме“, велат лозарите.

Времето за берба стигнува, но лозарите од Тиквешкиот крај ги очекува и друга мака. Годинава се очекува рекорден род, но ќе им проблем кој ќе го откупи, оти во земјава останаа малку винарски визби кои ќе го откупуваат грозјето. Регионот на Тиквеш е најголемиот производител на грозје во земјава, каде околу три илјади лозари живеат од оваа култура.

П. ПЕЧКОВ