За неполни два дена ќе заврши започнатата реконструкција на влезните патишта и приоди кон Клиничката болница во Штип, а во наредните фази се размислува за реконструкција и проширување на паркинзите за сите одделенија кои се во кругот на болницата од причини што Клиничката болница во Штип ја посетуваат граѓани и пациенти од цела источна Македонија.
„Влезните улици кон Клиничката болница во Штип кои беа дотраени и оштетени почнаа да се реконструираат со поставување нов асфалт за непречено влегување. Веќе заврши асфалтирањето на досегашниот главен влез на Клиничката болница во Штип кој и натаму ќе биде наменет за влез на цивилното население, а веднаш потоа продолжи асфалтирањето и на стариот влез кој беше затворен со години и сега ќе биде пренаменет за влегување само на возилата за итна помош затоа што досега тие имаа проблем на влегување од единствениот стар влез“, рекоа градоначалникот на Штип Иван Јорданов и директорот на Клиничката болница Владко Захариев.
Според кажаното, од општинската каса за овие реконструкции на градските влезови до објектите на Клиничката болница во Штип ќе бидат издвоени 65.000 евра, но ќе се реши децениски проблем затоа што ваква реконструкција на патната инфраструктура до Клиничката болница и во кругот на самата болница не биле направени речиси 60 години.
Клиничката болница во Штип, според Захариев, планира заедно со Општина Штип да изгради асфалтиран пристапен пат до Модуларната болница која веќе се преадаптира за специјалистички амбуланти, а истовремено се работи и планска изградба на адекватни паркиралишта кај Новата клиничка болница која е во изградба и на реконструкција и проширување на постојните паркиралишта во кругот на болницата со цел да се овозможи брз и полесен влез на граѓаните кои како пациенти доаѓаат во Клиничката болница во Штип .
Т. ЈОВАНОВСКИ
