Амбасадорите на Европската унија во Скопје ќе одат низ повеќе градови во земјата да ги учат граѓаните како да се ослободат од притисокот и слободно да гласаат на избори. Планот е да им укажат на важноста од слободно изразување, а ќе одговараат и на прашања од граѓаните за актуелната политичка состојба. Делегацијата на Европската унија во Скопје за САКАМАДАКАЖАМ.МК изјави дека се уште се подготвува агендата кои амбасадори во кои градови ќе одат.
Дел од оваа акција беше и посетата на евроамбасадорот Аиво Орав на Велес минатата недела, каде на отворена средба им одговараше на граѓаните на прашањата поврзани со работата на специјалната обвинителка, за Договорот од Пржино и за слободата на медиумите.
