Вработените во Националната галерија на Северна Македонија на чело со директорката Дита Старова-Ќерими денес со подароци и коктел му се заблагодарија за поддршката на холандскиот амбасадор Ваутер Пломп, чиј мандат истекува и до крајот на неделава ќе си замине од земјава.

Директорката Старова-Ќерими особено му се заблагодари и за ликовно-едукативниот проект „Уметност за сите“, наменет за децата со аутизам, оштетен говор, слух и вид, од најрана училишна возраст до завршување на средното образование. Проектот со поддршка на Холандската амбасада почна во јануари 2018, а ќе заврши годинава, со координација на кустосот Маја Димитрова.

„Амбасадорот е голем вљубеник во уметноста и има големи познаваања од историјата на уметноста, толку што некогаш останувавме затекнати од неговите прашања“, рече дирекорката.

Таа му подари графика, a Димитрова цртеж со пеперутки од проектот „Уметност за сите“, по што Пломп искрено ѝ се заблагодари на целата екипа и кажа дека делата навистина му се допаѓаат.

Б. НЕСТОРОСКА