Водечката француска издавачка куќа „Галимар“ пред 475 француски книжари го претстави „Тони“,  првиот роман на македонската писателка Румена Бужаровска. „Галимар“ ќе  објави „Тони“ на 3 септември годинава, во превод на Клое Бијон. По збирките раскази „Мојот маж“ (2022) и „Не одам никаде“ (2025), ова е трето дело на Бужаровска што е објавено од „Галимар“, издавач што постои 114 години.

„Тони“ го објави македонската издавачка куќа „Три“ во декември 2024, а на македонски јазик има четири изданија.

„Тони“ е објавен во Србија од издавачот „Бука“, во Хрватска од „Фрактура“, во Црна Гора „Нова књига“, 2025) и од „Бука“ во БиХ. Во мај годинава беше објавен и на шпански, од издавачката куќа „Едиторијал импедимента“ од Мадрид. Во текот на следната година романот ќе биде објавен во Португалија, САД, Грција и Албанија.

• „МОЈОТ МАЖ“ НА РУМЕНА БУЖАРОВСКА МЕЃУ 100 НАЈВПЕЧАТЛИВИ КНИГИ ЗА 2022 ВО ФРАНЦИЈА
• СЕ РАДУВАМ ШТО „ГАЛИМАР“ ЌЕ ЈА ИЗДАДЕ „МОЈОТ МАЖ“ ТОКМУ НА 8 СЕПТЕМВРИ, ВЕЛИ РУМЕНА БУЖАРОВСКА ЗА ФРАНЦУСКОТО ИЗДАНИЕ НА НЕЈЗИНИОТ БЕСТСЕЛЕР

„Романот е брутално комичен и длабоко трагичен, реалноста е секогаш пошокантна од тоа што го пишува во книгите. Тони е средовечен бивш рокер од Скопје, кој живее со мајка му и работи во државна институција. Во текот на пандемијата, ненамерно, но по своја вина, предизвикува неколку настани кои засекогаш го менуваат неговиот, а и животот на луѓето околу него. Ставајќи се себеси на прво место, Тони неприкосновено се држи за својата илузорна дефиниција за личната слобода. ’Тони‘ е роман за машкоста, за градот и за традицијата. Брутално комичен, но и длабоко трагичен, се чита во еден здив. Ова е роман што ќе ве удри од земја и ќе ве натера да ги преиспитате општествените, романтичните и семејните односи од нашето секојдневие“, вели издавачот „Три“.