Холанѓанката Хедвиг Фејен, основачка и директорка на Европското номадско биенале за современа уметност – Манифеста, утре (20 часот) ќе одржи предавање во Музејот на современата уметност (МСУ) Скопје. Манифеста е едно од најзначајните уметнички биеналиња во Европа и четврто по ред во светот. Почетоците се во раните 1990-ти, кога се разви како патувачка платформа која се разликува од главните центри на уметничкото производство. Манифеста е практично посредник помеѓу меѓународната уметничка и интелектуална сцена, отворајќи дебати и фокусирајќи се кон специфични прашања на локалната заедница.
Темата на предавањето на Фејен е целосен преглед на концептот на Манифеста, ќе ги претстави претходните изданија на биеналето и ќе го објави концептот, програмата и развојот на престојното 14. издание на Биеналето „Манифеста 14 Западен Балкан“.
Организаторите, овој пат, го избраа градот Приштина, поради неговата географска и геополитичка важност во рамките на Западен Балкан, со цел да го развијат проектот „Манифеста 14 Приштина“.
Иако седиштето на ова издание ќе биде во Приштина, биненалето ќе се реализира и во други градови од Западен Балкан. Музејот на современата уметност станува партнерска институција во организација на „Манифеста 14 Западен Балкан: Копроизводство на заеднички простор и обликување на формации на солидарност на Западен Балкан и пошироко“, кофинансиран од Европската Унија.
МСУ ќе биде организатор на програмска целина составена од дискурзивна и изложбена програма. Дискурзивната програма ќе се фокусира на функцијата на музеите на современа уметност во ерата на „Новата реалност“, која е обликувана од поврзани настани во текот на 2020 и 2021, како што се пандемијата, заклучувањата, затворените граници, одговорите на националистичката влада, непријателските еколошки политики, протести.
На презентацијата ќе бидат присутни и Емилија ван Линден и Нита Деда, координатори на Манифеста од Амстердам и Приштина.
Презентацијата во МСУ ќе биде реализирана со ограничен број од 30 седишта за публиката и според актуелните владини протоколи во услови на пандемија со потврда за вакцинација или потврда за имунитет на ковид-19 во последните 45 дена.
Б. НЕСТОРОСКА
