Актерот и продуцент Јовица Михајловски, сликарот Владимир Темков, мултимедијалниот уметник и еден од авторите на ТВ-емисијата „К-15“,  Љупчо-Бубо Каров и фолклористот Марко Китевски се годинашни добитници на државната награда „11 Октомври“, највисокото признание за животно дело во областа на науката, уметноста, стопанството и другите дејности од јавен интерес на Македонија.

Како што соопшти Министерството за култира, Каров, Темков и Михајловски се наградени за животно дело во областа на културата и уметноста, а проф-др Китевски, кој е истражувач на македонскиот фолклор за животно дело, во областа на науката.

Претседателка на Одборот за доделување на наградата „11 Октомври“ е проф. д-р Елена Јованова-Грујовска.

Државната награда се врачува во Собранието на Македонија на 11 Октомври – Денот на востанието на македонскиот народ.