Третиот дел од серијалот филмови „Тајните архиви на Скопје“ за Скопје и скопјани на авторката Катерина Габунија, насловен „ Човек – Лав стори“ ќе се прикаже вечерва во 20 часот во Кинотеката. Носител на проектот е Филмскиот центар „Вардар филм“, реализиран во соработка со Кинотеката.
Проектот „Тајните архиви на Скопје“ е инициран, режиран и координиран од Габунија, а монтажата и дигитализацијата се на Александар Трајковски. Третиот дел претставува колаж од дигитализирани 8-милиметарски филмски ленти, чии протагонисти се граѓаните на Скопје.
- СКРИЕНО ФИЛМСКО БОГАТСТВО ГИ ОТКРИ ТАЈНИТЕ НА СКОПЈЕ, НА 13 НОЕМВРИ ПРЕМИЕРА НА КРАТОК ФИЛМ СТВОРЕН ОД ЛИЧНИ АРХИВИ НА СКОПЈАНИ
- ВТОРИОТ ДЕЛ ОД „ТАЈНИТЕ АРХИВИ НА СКОПЈЕ“ ПРЕМИЕРНО ЌЕ СЕ ПРИКАЖЕ НА 10 АВГУСТ
„Во овој трет дел акцентот е на љубовта. Таа ги спојува сите генерации и ги поврзува минатото и сегашноста. Љубовта е најсилната емоција која секогаш ја освојува публиката пред филмското платно. Слатка, возбудлива и горка сме ја искусиле сите и најлесно ни е да се соживееме и да ја разбереме таа емоција. Нефилмуваната љубов на скопјани е послатка и пореална од совршената“, вели Габунија.
Проектот е реализиран, исто како и претходните, прво со јавен повик до граѓаните за собирање на осум и суперосуммилиметарски ленти.
Понатаму, вели таа, продолживме со дигитализација и дигитална обработка на лентите, и на крај кон монтажа на слика и звук.
„На овој начин преку архивирање и дигитализација на стари филмски ленти од домашната архива на скопјани се открива скриеното богатство за животот во градот, но и се зачувуваат драгоцени документи, кои доколку не бидат дигитализирани ќе исчезнат или ќе бидат дегенерирани и неупотребливи“, вели Габунија.
Б. НЕСТОРОСКА
