Македонската малцинска копродукција „Полусестра“ на еден од водечките словенечки и балкански автори Дамјан Козоле на 2 јули ќе има светска премиера во главната селекција на Филмскиот фестивал во Карлови Вари, Чешка. Македонски копродуцент е „Сестри и брат Митевски“. По премиерата, филмот ќе има уште две проекции на 3 и 5 јули.
Митевски како малцинска копродукција учествуваа и во претходниот филм на Козоле „Ноќен живот“, кој исто така премиерно беше прикажан во Карлови Вари, и каде освои и Кристален глобус за најдобра режија во 2016.
„Полусестра“ е копродукција помеѓу Словенија, Македонија и Србија. Филмот е за две полусестри и проблемите со кои се соочуваат.
Од македонска страна филмот e поддржан од Агенцијата за филм, а македонската екипа ја сочинуваат актерката Лабина Митевска, монтажер на филмот е Атанас Георгиев, снимател на тон Игор Поповски-Нивеа, микроман Дарко Бошковски, асистент на камера е Маријан Боцевски, арт-директор во сценографија е Бобан Петрушевски, дел од звукот е работен во „Аудиохаус“, а македонскиот дел од кастингот направен од Киријана Николоска.
Б. НЕСТОРОСКА
