Вечерва во 19 часот во Ликовниот салон на МАНУ ќе се отвори изложбата „Иконите на Дичо Зограф“ посветена на еден од најпознатите иконописци и фрескосликари на Балканот во 19. век. Изложбата ќе трае до 25 октомври.
Дичо Зограф (Димитар Крстев Дичов, познат и како Дичо Крстевиќ) во својот живот насликал повеќе од 2.000 икони за црквите во Македонија, Србија и Грција.
Ќе бидат изложени 25 икони и десет репродукции, повеќето од црквите во Мала Река и Дебарско, од Тресонче, Росоки, Сенци, предмети од Бигорскиот манастир, како и икони од струшка Малесија, од Селци.
На отворањето ќе говорат претседателот на МАНУ, академик Таки Фити, архиепископот охридски и македонски г. г. Стефан и д-р Сашо Цветковски од ИЦКН „Цветан Грозданов“ при МАНУ.
МАНУ и МПЦ – Охридска архиепископија за утре и задутре го најавуваат меѓународниот научен собир „200 години Дичо Зограф (1819-2019)“. Собирот на историчарите и историчарите на уметност ќе заврши со посета на Бигорскиот манастир.
