Во Музејот на Македонија од 15 ноември ќе почне да се спроведува проектот „Мајка“ – Приказна за мајката, од неолитот до денес, раскажана преку делата изложени во музеите во Скопје.

Проектот е наменет за деца од училишна возраст од трето до шестто одделение, а од Музејот ги повикуваат наставнииците да закажат термини на 02/3116-044.

Едукативната прошетка ќе ја водат вработените во музеите, почнувајќи од Археолошки музеј, движејќи се до Национална галерија (објект Даут пашин амам), потоа преку Стара скопска чаршија до Музеј на Македонија и Музејот на современата уметност (МСУ).

„Мајка-животодателка, божица на плодноста, инспирација за многу современи дела, мајка насликана на платно во својот совршен облик, невеста-мајка-жена во непроценлива народна носија, во улога на семејно светилиште од искона го чува мирот во домот, претставува заштитничка на куќата, семејството и поколенијата. Мајка – единствена и сеопфатна во својата многузначна симболика“, велат од Музејот на Македонија.