По 66 години од првата и 13 години од последната американска турнеја во 2009, Ансамблот за народни песни и ора „Танец“ следната година ќе замине на турнеја низ Северна Америка. Од Националниот ансамбл велат дека турнејата е закажана од 15 до 26 февруари, со седум големи концерти во седум градови низ Канада и САД. Концертите ќе се одржат во сали во Монтреал, Отава, Торонто, Детроит, Чикаго, Кливленд и Њујорк.
Подготвувајќи се за турнејата, од „Танец“ ги споделуваат сеќавањата за првата турнеја во САД. Настапот на на 27 јануари 1956, во престижната сала Карнеги хол на 40-мината играорци и музичари на „Танец“, кој за музичкиот критичар Џин Мартин од „Њујорк тајмс“ бил вистинска „радост и одушевување“, е само еден од 40-те концерти од првата турнеја во САД во 1956.
„Танец“ воедно бил и меѓу првите културни репрезенти на Југославија кои отпатувале во САД и чиј ансамбл настапувал цели два месеца.
„Во тогашниот состав играле легендарните играорци од првата генерација како Радмила Вишинова, Милка Наумова, Станимир Вишински, Атанас Коларовски, Александар Сариевски, Цветко Мицевски, Јонче Христовски и др. На репертоарот била т.н. ‘Југословенска програма’, која вклучувала кореографии и музички обработки од народите и народностите на тогашната ФНРЈ, меѓу кои антологиските Невестинско и Тешкото, Копачката, Арамиско, Русалии, потоа Шопска петорка, Ќупурлика, но и Буњевачко момачко коло, Барањска хумореска и други српски, хрватски и неизоставните македонски ора“, велат од „Танец“.
