РАЦИНОВОТО ПРИЗНАНИЕ ГО ДОБИ МИЛОВАН СТЕФАНОВСКИ ЗА РОМАНОТ „ТЕОРИЈА НА КУЧЕШКАТА ГОДИНА“

    РАЦИНОВОТО ПРИЗНАНИЕ ГО ДОБИ МИЛОВАН СТЕФАНОВСКИ ЗА РОМАНОТ  „ТЕОРИЈА НА КУЧЕШКАТА ГОДИНА“„Со силна возбуда ја примив информацијата дека мојот роман, шести по ред, е добитник на Рациновото признание“, рече Стефановски во Велес. (Фото: СДК.МК)

    Милован Стефановски е добитник на Рациновото признание за 2021, за романот „Теорија за кучешката година“ во издание на „Матица македонска“. Наградата ќе му биде врачена викендов, кога во Велес ќе се одржат 58. Рацинови средби.

    „Во својот најнов краток роман писателот Милован Стефановски одбира преку своевидно монолошко обраќање на син кон татко на индиректен начин на читателот да му ја пренесе целата приказна без притоа да се приведе ниту едно лично име, ниту конкретна локација или топоним, ниту пак временска одредница за тоа кога се случува дејството“, кажа Христо Петревски, претседател на жирито кое ја донесе одлуката за наградата. Во него членуваа и Стефан Марковски и Делвина Крлуку.

    Годинава Рациновото признание е доделено во конкуренција од 27 дела, што досега не е забележана бројка на пријавени дела во историјата на Рациновите средби. Во најтесна конкуренција за наградата останале девет дела.

    Добитникот Стефановски рече дека е почестен со добивањето на признанието.

    „Рацин за припадниците на мојата генерација, роден сум 1952, е книжевна икона. Затоа со силна возбуда ја примив информацијата дека мојот роман, шести по ред, е добитник на Рациновото признание. Досега не сум учествувал на Рациновите средби и еве пред мојата 70. година живот, добив шанса да бидам и учесник и награден. Во последно време опаѓа интересот за книгата, се надевам дека ќе дојдат подобри времиња, но за тоа не треба само очекувања туку и наш, авторски поголем придонес“ рече Стефановски.

    Почесното Рациново признание го доби Ала Генедјева Шешкен од Русија, професорка на Универзитетот Ломоносов во Москва, за нејзината афирмацијата на македонска литература и култура во светот. Таа е надворешен член на МАНУ.

    Три дена од претстојниот викенд, ќе се чествуваа делото на Рацин со повеќе содржини, меѓунив и меѓународниот поетски митинг со учество на поети од Македонија, Бугарија, Србија, Црна Гора, со меѓународен научен симпозиум на тема „Синтези за Рацин и Конески“ . В недела ќе се посети местото на погибјето на поетот и револуционер Рацин, на Лопушник. Беседата за Рацин на отворањето на манифестацијата, годинава е на проф. д-р. Атанас Вангелов.

    П. ПЕЧКОВ

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира