„Северен пол“ на Марија Апчевска се најде меѓу кандидатите за годинашниот Европски оскар за најдобар краток филм. Во пошироката конкуренција се уште 24 наслови.

„Северен пол“ е првиот македонски филм кој беше во конкуренција за Златна палма откако имаше светска премиера на ланското издание на Канскиот фестивал. Оттогаш учествуваше на повеќе од 40 фестивали низ цел свет и освои неколку награди. Со триумфот на Интернационалниот фестивал на документарен и краток филм ЗИНЕБИ во Билбао се квалификуваше и за кандидат за Оскар.

Филмот е копродукција на Македонија, Србија и Унгарија. Во продукција на „Кино око“, снимен е по сценарио на Апчевска, а во главни улоги се Антонија Белазелкоска и Лука Митев.