Режисерот Коле Ангеловски слави 60 години активна уметничка кариера, со нова претстава, по негов текст, „Птица со глава меѓу нозе“. Премиерата е закажана на 10 ноември во 20 часот во Драмски театар.

Директорката на театарот Катарина Коцевска-Хаџи Василева, на денешната прес-конференција кажа дека премиерата ѝ ја посветуваат на колешката Сабина Ајрула-Тозија, која почина на 10 август на 75 години.

Ајрула-Тозија е една од легендарните актерки на Драмски, а, како што рече директорката, најпрепознатлива беше по улогата на Фатиме, токму од претставата на Ангеловски, „Солунски патрдии“, и затоа сакаат да ѝ оддадат почест, со оглед на тоа дека во август немало услови за комеморација.

Ангеловски рече дека го пишувал текстот во 2018-19, и вели, како да предвидел некои работи кои се случија и кои сè уште сѐ случуваат.

„Тоа е една љубовна приказна, љубов кон девојка, кон татковина, но не ваква татковина, поделена на патриоти и предавници. Зборуваме за љубов кон професијата, една носталгична љубов кон професијата, како било, како е, и сето тоа драматуршки ставено во еден интересен заплет. Чудна комедија со среќен крај. Птицата е симбол на слобода. Може да лета каде сака, за неа не постојат граници, не постојат ограничувања, но, ако главата и е меѓу нозе, ќе лета, ама ниско“, рече Ангеловски.

Играат: Стефан Вујисиќ, Маја Вељковиќ-Пановска, Благој Чоревски, Ѓокица Лукаревски, Марија Кондовска, Анастас Тановски, Калина Наумовска, Благица Димитровска и Симон Манасковски.

Сценографијата е на Илина Ангеловска, костимите на Раде Василев, а музиката на Кокан Димушевски.

Со последните одлуки на Владата, театрите може да примат 50 отсто публика, влезот е со ковид сертификат за примена вакцина или прележана болест.

Б. НЕСТОРОСКА