„Алкалоид АД“ Скопје оствари позитивни финансиски резултати во периодот јануари-март 2019, покажуваат неревидираниот единечен и неревидираниот консолидиран Биланс на успех.
Според единечниот Биланс на успех, продажбите достигнуваат 2.101.073.373 денари, 14% повеќе во споредба со истиот период минатата година. Добивката пред финансиски трошоци, даноци и амортизација, која изнесува 422.772.099 денари, бележи зголемување од околу 16%, додека единечната нето добивка изнесува 247.475.979 денари и е зголемена за 15%.
Вкупните консолидирани продажби достигнуваат 2.833.475.867 денари, што е за 15% повеќе во споредба со истиот период од минатата година. Притоа, 32% се остварени на домашен пазар, а 68% на странски пазари, најмногу во земјите од Југоисточна Европа и во Русија. Најзабележителен раст на извозот е остварен во Велика Британија – 4,8 пати повеќе од лани, потоа во Грузија (зголемување за двапати) и во Полска, од 72% споредено со истиот период од минатата година. Кај извозните пазари пораст бележат и Унгарија (63%), Русија (58%), Украина (57%), Бугарија (49%), Германија (42%)…
Гледано по групи производи, во структурата на вкупните консолидирани продажби најголемо учество заземаат производите од сегментот Фармација, и тоа 88%. Сегментот Хемија, Козметика и Билкарство учествува со 12% во вкупните консолидирани продажби.
Консолидираната добивка пред финансиски трошоци, даноци и амортизација, која достигнува 490.980.742 денари, бележи раст од 19%, додека нето консолидираната добивка во износ од 294.542.101 денари е зголемена исто така за 19%.
Вкупните инвестиции во основни средства во периодот јануари-март 2019 изнесуваат 193.866.065 денари. Во „Алкалоид“ се реализирани и 55 нови вработувања.
