Францускиот иноватор Френки Запата стана првиот човек кој го прелетал каналот Ламанш со флајборд.

Четириесетгодишниот Запата тргна од Санжат во близина на Кале и слета во заливот Сент Маргарет во Довер. За патувањето долго 35,4 километри, на коешто носеше керозин во ранец, му требаа 22 минути.

Тој првпат се обиде да го прелета Ламанш со својот изум на 25 јули, но тогаш се откажа поради проблеми со доводот на горивото.

„Ја направивме оваа машина пред три години и сега успеавме со неа да го преминеме Ламанш. Беше лудо. Не знам дали ова е историски потфат или не, времето ќе покаже“, изјави Запата, кој леташе со брзина од 170 километри на час.

Тој првпат го претстави својот изум минатиот месец, за време на годишната парада за Денот на Бастилја во Париз.