Стотици парчиња сирење чедар вредни над 350.000 евра се украдени од лондонската продавница специјализирана за сирење, „Нилс јард“. Продавницата соопшти дека измамник кој се претставувал како дистрибутер на големо за голем француски продавач заминал со 950 парчиња, односно 22 метрички тони наградуван чедар пред компанијата да сфати дека била измамена и дека станува збор за кражба.

„Високата парична вредност на овие сирења веројатно ги направила посебна цел за крадците“, се вели во соопштението на „Нилс јард“, дистрибутер, трговец на големо и малопродажба на британско ракотворно сирење.

Британската полиција и меѓународните власти трагаат по виновниците. Исчезнаа речиси 950 тркала сирење завиткано со платно од тројца производители: органски чедар „Хафод Велс“, чедар „Весткомб“ и чедар „Пичфорк“. Млекарницата продава парче „Хафод“ чедар за 15 евра за 270 грама. Том Калвер, директор на млекарницата „Весткомб“, рече дека вложиле многу труд за да се направи сирењето кое било старо од 12 до 18 месеци.

Продавницата „Нилс јард“ побара од меѓународните продавачи на сирење да внимаваат на украденото сирење, особено во блокови од 10 и 24 килограми. Вели дека целосно ги платила сите три производители на сирење, во согласност со нејзиниот етос за поддршка на малите независни бизниси кои го развиваат британскиот сектор за сирење.