Словачкиот парламент усвои амандман на законот за сообраќај со кој максимално дозволената брзина на тротоарите во урбаните области е шест километри на час. Ограничувањето се однесува на сите кои смеат да користат тротоари – пешаци, велосипедисти, скејтери и возачи на тротинети.

„Главната цел е да се зголеми безбедноста на тротоарите со оглед на зголемениот број судири со возачи на тротинети. Амандманот ќе биде корисен за докажување прекршоци, особено во случаи кога е потребно објективно да се утврди дали се движеле побрзо од она што се смета за соодветна брзина во области наменети првенствено за пешаци“, рече авторот на амандманот Лубомир Важни од партијата Смер на премиерот Роберт Фицо.

Иако законот ќе стапи во сила на 1 јануари 2026, предлагачите јавно не објаснија како планираат да го спроведат.

Просечната брзина на одење обично изнесува 4-5 километри на час. Според Британската фондација за срце, темпото од 6,4 километри на час се смета за умерено за некој со одлична физичка подготвеност.

Опозицијата ја критикуваше промената, а дури и словачкото министерство за внатрешни работи кажа дека би било посоодветно да се забранат електричните тротинети на тротоарите отколку да се воведе општо ограничување на брзината.