Гитарскиот виртуоз Влатко Стефановски и македонски музичари од повеќе жанрови го преработија хитот „Чукни во дрво“ на култната група „Леб и сол“ од 1989 . Стефановски, кој беше дел од бендот со која растеа генерации, вели дека идејата е на Мери Попова, уредничка на Културно-уметничката програма во Македонската радиотелевизија (МРТВ), која му се јавила, тој размислил пет минути и се согласил.

„Знаете, веќе излегоа многу преработки, сите се снимаат дома, но ‘Чукни во дрво’ е пролетна песна, полетна песна, дава надеж, оптимизам и ми се виде како фина идеја да донесе малку надеж во оваа тмурна пролет. Ова е повеќе социјален отколку музички проект. Ме радува дека има музичари и од класичната музика, како оперската пејачка Весна Ѓиноска-Илкова и пијанистот Симон Трпчески, и сум многу благодарен на сите колеги кои со добра волја  ја прифатија поканата“, изјави Стефановски за САКАМДАКАЖАМ.МК.

Сите се снимале дома, а потоа видеата се монтирале во МРТВ, и целиот проект бил готов за една недела.

Во проектот се вклучени и младите музичари Јан Стефановски на тапани и Иван Кукуќ на бас гитара, кои настапуваат со Влатко Стефановски на концерти, како и музичките уметници Вера Милошевска-Јосифовска од „Љубојна“, Влатко Лозаноски, Алекандар Митевски, Драган Спасов-Дац, Миле Кузмановски, Калиопи, Ленче и Горан Кукиќ, Андријана Јаневска, Пере од „Нокаут“, како и Мандолинскиот оркестар „Скопје“ во аранжаман и под диригенство на Ерхан Шукри.

Б. НЕСТОРОСКА