Младиот гостиварец Анди Исмаили ја освои титулата во модерен танц на ИДО Европското првенство во балет, џез и модерен танц, што се одржуваше во салата „Јане Сандански“ во Скопје од 8 до 11 септември. Тринаесетгодишниот Исмаили славеше во конкуренција на јуниори, пред Полјакот Натан Гжибовски и Словакот Адријан Баркол.
Иако е многу млад, ова не е прва голема титула за Исмаили. Тој е двократен светски јуниорски шампион во модерен танц: првото злато го освои во 2019, а потоа ја одбрани титула на Светското првенство во Полска, што се одржа минатиот декември.
Исмаили е член на танцовото студио „Ај денс“ од Гостивар, а со танц почнал да се занимава во 2017, по што брзо почнал да го докажува својот вонсериски талент.
