На Клиничкиот центар „Мајка Тереза“ во Скопје во тек се подготовки за четвртата трансплантација на срце во земјава, објави на Фејсбук министерот за здравство Венко Филипче.
Д-р Маја Мојсовска – Мијовска, национална координаторка за трансплантација ни рече дека дарителка е 44-годишна жена чие семејство се согласило да се трансплантираат нејзиното срце, бубрезите и дел од коскеното ткиво.
„Драго ми е дека ја подигнуваме свеста на граѓанките и граѓаните за донирање органи. При секоја трансплантација, одново и одново секогаш им се восхитувам на хуманоста на семејствата што во најтешките моменти, кога го губат најмилото успеваат да најдат храброст да се согласат да донираат органи и да продолжет нечиј туѓ живот. Се радувам дека луѓето сè повеќе го сфаќаат концептот на трансплантација од починат донор“, вели д-р Мојсова-Мијовска за САКАМДАКАЖАМ.МК.
Првата трансплантација на срце од починат донор во земјава беше направена лани на 23 мај, а годинава се извршија уште две трансплантации. Во сите четири случаи, дарителките се жени.
Б. НЕСТОРОСКА
