ДОСЕГА НЕМА ПРИЈАВИ ОД АДМИНИСТРАЦИЈАТА ЗА ПРИТИСОЦИ НА РАБОТНОТО МЕСТО ВО ПРЕСРЕТ НА РЕФЕРЕНДУМОТ, ВЕЛИ МАНЧЕВСКИ

    Никој од администрацијата не пријавил притисоци на работното место во пресрет на референдумот на посебната алатка на интернет страницата на Министерството за информатичко општество и администрација, која беше отворена на 13-ти овој месец, кажа министерот за информатичко општество и администрација Дамјан Манчевски.

    Тој рече дека алатката е отворена за да ги заштити вработени во јавната администрација, кои во случај на притисок имаат лесно достапно место каде да се обратат.

    Пријавувањето е анонимно, а Манчевски кажа дека ако вработениот кој пријавува сака да ги сподели своите лични податоци, тие ќе бидат заштитени согласно Законот за заштита на лични податоци.

    „Тоа е предупредување за сите министри, директори, раководители дека секој нивен обид ќе биде најжестоко санкциониран. Притисоци, уцени и злоупотреби во јавната администрација не смее да има. Се обидуваме целосно да ја смениме сликата за заробена држава. Министерството за информатичко општество и администрација се обврзува сите пристигнати пријави да ги проследи до надлежните органи за натамошно постапување и ова веќе е искомуницирано со сите надлежни институции. Ги повикувам сите граѓани ги уверувам дека сите нивни пријави се анонимни, ќе бидат процесуирани и соодветно постапено по нив“, рече Манчевски.

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари