Европската Комисија (ЕК) денеска ги предаде преговарачките рамки за Северна Македонија и Албанија до Советот на ЕУ (земјите членки на ЕУ), содржината на рамките нема да се објави додека Советот не ги усвои.
„Денес се одбележува уште еден важен чекор на патот на Албанија и Северна Македонија кон Европската Унија, стои во писмената изјава на еврокомесарот за проширување, Оливер Вархеји.
Преговарачките рамки се позицијата на Европската Унија во преговорите за членство. Европската Комисија поднесува нацрт рамки до земјите членки, кои треба да ги усвојат по евентуални модификации. Рамките се поделени на три дела: водечките принципи на пристапните преговори, суштината на преговорите и преговарачката процедура, со цел да се обезбеди целосно спроведување на европското законодавство и неговите принципи во законските рамки на земјите кандидати.
Во споредба со рамките на претходните земји кандидати, Европската Комисија вели дека за Скопје и Тирана се додадени и начелата на новата преговарачка методологија усвоена во март, земен е предвид и развојот на европското законодавство како и специфичностите и заслугите на секоја поединечна земја.
Конкретно, фокусот на овие рамки е врз владеењето на правото, функционирањето на демократските институции и јавната администрација, како и економијата, а се предвидува „посилен политички двигател“ на процесот како и подинамичен ритам на преговорите преку групирањето на поглавјата за преговори во тематски кластери.
„Со нетрпение ги очекувам дискусиите помеѓу земјите членки за да се одржат што е можно побргу првите меѓувладини конференции со двете земји. Нивната иднина јасно се наоѓа во Европската Унија и уверен сум дека тие ќе продолжат да ги исполнуваат реформите на патот кон ЕУ, како што досега тоа го правеа“, изјави Вархеји.
Според дипломатите во Брисел не се очекува првата меѓувладина конференција пред крајот на оваа година.
Земјите членки би требало да разговараат за проширувањето од септември, со оглед на тоа дека летото ќе биде целосно посветено на обидот да се пронајде компромис за излез од економската криза на ЕУ и иднината на нејзиниот буџет.
Mинистерот за надворешни работи Никола Димитров во видеоизјава рече дека веќе следната недела во Брисел ќе се разговара од страна на земјите членки на експертско работно ниво. Тој се надева дека со
„Германското претседателство на ЕУ и заедно со германската поддршка во следниве месеци ќе
ја отвориме првата Меѓувладина конференција“. Додава дека суштината на предложената Преговарачка рамка е европските стандарди да си ги донесеме дома. Пред се’ демократските принципи и вредности поврзани со владеењето на правото, како и економските реформи.
Тој рече дека во тој момент, започнува конкретното одвивање на пристапниот процес преку завршување на скрининг процесот и отворање на првиот кластер наречен – Основни вредности кој ги третира клучните реформски области од Поглавјето 23 – Правосудство и фундаментални права, Поглавјето 24 – Правда, слобода и безбедност, Економските критериуми, Функционирањето на демократските институции, Реформата на јавната администрација, Поглавјето 5 – Јавни набавки, Поглавјето 18 – Статистика и Поглавјето 32 – Финансиска контрола.
