Јавниот обвинител Љубомир Јовески и специјалната обвинителка Катица Јанева се согласија дека постапувањето по истрагите на СЈО за кои нема покренато обвинение ќе продолжи согласно позитивните законски прописи, соопштија заедно двете обвинителства. Јовески и Јанева денеска имаа работна средба, откако Врховниот суд вчера усвои мислење дека СЈО по истекот на 18 месеци од преземањето на прислушуваните разговори (а тоа е 30 јуни 2017), Специјалното обвинителство воопшто не смеело ниту да покренува нови истраги, ниту пак да презема од редовното обвинителство истраги.

„На средбата беа разгледани состојбите и можностите за натамошно постапување по предметите по кои постапува Јавното обвинителство за гонење на кривични дела поврзани и кои произлегуваат од содржината на незаконското следење на комуникациите. Во тој контекст, Јовески и Јанева се согласија дека постапувањето по овие предмети ќе продолжи согласно позитивните законски прописи“, се вели во соопштението на Јавното обвинителство и Специјалното јавно обвинителство.

• НИШТО НЕ Е ГОТОВО, ВЕЛИ ЈОВЕСКИ И ЧЕКА СИГНАЛ ОД КАТИЦА ДА ГИ ПРОДОЛЖИ ИСТРАГИТЕ НА СЈО
• АХМЕТИ, БУЈАР, БОНЕВА, МИЛОШОСКИ И ЈАНУШЕВ СЕ СПАСИЈА, ВРХОВНИОТ СУД ГИ ЗАБРАНИ ИСТРАГИТЕ НА СЈО ПРОТИВ НИВ

Јовески вчера, во изјава за САКАМДАКАЖАМ. МК, рече дека чека акција од СЈО и да седнат со тимови да ги отворат предмет по предмет нивните отворени истраги, да видат до каде се, доказите дали и колку се собрани и да одлучат што од тие предмети може да биде преземено од страна на Обвинителството за организиран криминал и корупција.