Извршниот одбор на Лекарската комора по денешната седница испрати барање до Фондот за здравствено осигурување ургентно да го решат проблемот со лекарката од Виница, која поради тоа што остана без медицинска сестра со месеци не добива капитација.
Здружението на приватни лекари денес најави дека одлучиле да излезат на протестен марш низ улиците на Скопје, доколку не се најде решение за овој проблем, а датумот на протестот допрва ќе го утврдат.
„Знаеме дека работат и бараат решение, но во случајов колешката не добива капитација, а тоа значи дека нема плати и нема здравствено осигурување. Тоа е под достоинството на докторската дејност. Сериозни сме во барањето до институциите да го решат проблемот. Ова не е проблем само на докторите, туку се јавува и кај стоматолози. Не е решение да се затвори ординацијата, тоа е најлошо можно решение. Имаме региони каде има сериозен недостиг и од доктори, но и од медицински сестри“, вели Гривчева-Старделова.
Е. БОЧВАРОСКА
