Македонија назадуваше од делумно слободна во неслободна земја според слободата на медиумите, оцени меѓународната организација Фридом хаус во најновиот извештај за 2016. Според Фридом хаус, причината за назадувањето е „откривањето дека постои големо незаконско владино прислушување на новинарите, коруптивни врски меѓу функционери и сопственици на медиуми и зголемување на заканите и нападите врз медиумските работници“.

Во резимето на извештајот се вели дека медиумите во Македонија се длабоко поделени по политичка линија.

„Самоцензурата меѓу новинарите е вообичаена, пред сѐ поради притисокот од сопствениците на медиумите со особени бизнис или политички интереси и, од  неодамна,  поради загрженоста од прислушувањето. Новинарите се лошо платени и се соочуваат со закани и малтретирање кога се занимаваат со истражувачко новинарство или критичко пишување,“ се вели во извештајот на Фридом хаус за Македонија за 2016.