Премиерот Христијан Мицкоски и лидерот на опозициската СДСМ Венко Филипче се договориле да се формираат работни групи кои ќе разговараат за реформските законски решенија што треба да ги гарантираат заложбите за напредок, соопшти Владата по денешната средба. Средбата следи откако вчера Филипче на прес-конференција предложи концепт за нов општествен и политички дијалог, и најави дека ќе побара средба со премиерот за да му го презентира овој концепт.
„Државата мора да биде во служба на граѓаните, и да се случат коренити реформи на системот од кој граѓаните се незадоволни“, изјавил Мицкоски на средбата.
Од Владата велат дека на средбата е истакната потребата да се работи на заедничката иднина за граѓаните, како и да се работи на консензус меѓу различните страни за клучните прашања за државата и добробит на сите граѓани.
„Во тој контекст неопходно е да се мобилизираат сите напредни поединци и структури кои можат да дадат придонес на патот за развој на земјата. Македонските државни интереси треба да бидат појдовната точка во разговорите за секое прашање, при што Мицкоски побара од Филипче да се потруди да биде конструктивен фактор во определбата за промени, реформи и напредок“, соопшти Владата по средбата.
Филипче по средбата изјави дека власта и опозицијата заеднички ќе работат на законите кои се дел од реформската агенда на земјава и рече дека средбата била добра и конструктивна и има волја од двете страни за соработка.
