МВР поведе дисциплинска постапка за двајца полициски службеници од Одделението за лично обезбедување на Претседателката на РСМ кои лажно тврделе дека возилото „порше“ паркирано на велосипедска патека пред ресторан во скопско Дебар Маало е службено. Според очевидци, на 22 март колата ја паркирал ексминистерот Срѓан Керим кој бил во една од кафеаните на Боемска улица, а тогаш бил во друштво со сопругот на претседателката Гордана Сиљановска-Давкова, Благој Давков. Видеото во кое се гледа дека пајак-службата и полицијата не сакаат да го кренат возилото беше објавено на 4 април на социјалните мрежи. Полицаецот во видеото вели дека колата е на полициски службеник на должност.

Од МВР соопштија дека Одделот за внатрешна контрола, криминалистички истраги и професионални стандарди (ОВККИПС)  изврши проверки по видеоснимка објавена на 4 април на Фејсбук, на која се гледа како група граѓани бараат од полициски службеник, кој постапува со пајак, да го подигне возилото „порше каен“ со скопски регистарски ознаки, поради тоа што било паркирано на велосипедска патека, односно на коловоз.

„Полициски службеници од ОВККИПС извршија проверки во ОБПС Скопје и утврдија дека од нивна страна е постапувано по прекршок за погрешно паркирање сторен од возач на патничко возило ‘порше каен’. По извршен увид во службената документација, констатирано е дека полицискиот службеник С. Н. од ОБПС Скопје, на 22.03.2025 постапувал по Наредба за вршење дејност бр. 3626 од 21.03.2025 година за непрописно паркирани возила. Од страна на граѓанинот С. Н., на телефонскиот број 192 било пријавено дека на улица Орце Николов, во близина на ресторан, непрописно било паркирано возилото ‘порше каен’. Полицискиот службеник С. Н., со специјално возило „пајак“ и двајца вработени од ЈП за јавни паркиралишта на Општина Центар, се упатиле на наведеното место, каде што било затекнато возилото и револтирана група граѓани кои барале возилото да биде подигнато. На местото на настанот, од угостителски објект излегле две лица кои се легитимирале како полициски службеници и изјавиле дека возилото е службено. Полицискиот службеник С. Н. им наредил веднаш да го отстранат возилото и да го паркираат на соодветно место, по што влегол во кабината на пајак возилото со цел да провери дали возилото навистина е службено. Откако утврдил дека возилото не е службено и дека сè уште не е отстрането, на вработените од ЈП Јавни паркиралишта им дал наредба да го подигнат возилото, по што истото било пренесено во депото. Таму, од страна на полицискиот службеник Х. Ѓ. е составен записник за сторен сообраќаен прекршок по чл. 63 став 6 од ЗБСП, како и прекршочен платен налог, во кој е наведено дека сторител на прекршокот е С. К. (76) од Скопје. Сопственик на возилото е М.Т. (48) од Скопје. Двете лица кои се претставиле како полициски службеници и тврделе дека возилото е службено, со патничко возило ‘форд мондео’ се упатиле кон депото. Полициските службеници од ОВККИПС извршиле проверки за возилото ‘форд мондео’ и констатирале дека истото го управувале полициските службеници Т. Д. и И. С., распоредени во Одделението за лично обезбедување на Претседателот на РМ“, велат од МВР.

Од полицијата велат дека со овие полициски службеници е извршен службен разговор, при што е констатирано дека сториле потешко прекршување на работниот ред и дисциплина. ОВККИПС до Одделот за дисциплински и судски постапки ќе поднесе предлог за утврдување на дисциплинска одговорност.

• ЕКСМИНИСТЕРОТ СРЃАН КЕРИМ ГО ПАРКИРАЛ „ПОРШЕТО“ НА ВЕЛОСИПЕДСКА ПАТЕКА, ДОДЕКА БИЛ В КАФЕАНА СО СОПРУГОТ НА ПРЕТСЕДАТЕЛКАТА СИЉАНОВСКА-ДАВКОВА
• СЕ ВОДИ ПОСТАПКА ПРОТИВ ПОЛИЦАЕЦОТ КОЈ НЕ ДОЗВОЛИ ДА СЕ КРЕНЕ „ПОРШЕ“ ПАРКИРАНО НА УЛИЦА ВО ДЕБАР МААЛО, СОПСТВЕНИКОТ Е КАЗНЕТ И НЕ Е ПОЛИЦИСКИ СЛУЖБЕНИК, ВЕЛАТ ОД МВР