Специјалната обвинителка Катица Јанева, зборувајќи по малку за сите поднесени обвиненија кои се во судска постапка во интервју за телевизијата 24, ја повика ексминистерката за култура Елизабета Канческа – Милевска да си го признае делото во случајот „Тендери“.

„Најдобро е поранешната министерка да си го признае делото. Имате реновирање околу музејот без тендер, па дури потоа тендер. Случајот е многу чист, сè си пишува во документи“, рече Јанева во вечерашното интервју на ТВ 24, повикувајќи ја неколку пати Канческа – Милевска да го признае кривичното дело злоупотреба на службената положба и овластувањата, во врска со нелегален тендер за градежни активности за уредувањето на Музејот на ВМРО.

Зборувајќи претходно за признанието на сега осудената Ивона Талевска за даночно затајување, Јанева рече дека такви изјави: „Да, виновна сум, го признавам делото за кое ме товари обвинителството“, не може а да не ги цени судот при носењето на пресудата.

Освен документите од незаконскиот тендер и прислушуваните разговори, сведок во случајот „Тендери“ е поранешниот директор на Бетон Штип Илија Бреслиски, кој во истрагата потврдил дека ексминистерката му рекла да почне да гради и да не го чека тендерот, бидејќи средила него да го добие токму оваа компанија, што и се случило.

С. К. ДЕЛЕВСКА