Министерката за труд и социјална политика Мила Царовска најави дека со измените на Законот за социјална заштита родителите кои имаат дете со попреченост и кои се невработени, а при тоа цело време се грижеле за детето, односно не го сместиле во институција ќе можат да добијат пензија и тоа за жени по навршување на 62 години, а за мажи по навршување на 64 години.
Од Министерството за труд и социјална политика велат дека с уште работат на законските измени и дека ова е всушност траен надоместок, а предвидено е тој да изнесува 8.000 денари.
Во нацртот на законските измени стои дека вакво право ќе можат да остварат родителите кои се грижеле за своето дете 26 години, бидејќи според законските одредби за дете со попреченост се смета лице до неговата 26 годишна возраст.
„Правото на траен надоместок ќе може да го оствари секој, којшто ги исполнува условите предвидени со законското решение, откако истото ќе стапи на сила. Оваа одредба е во фаза на доработка бидејќи се прифатени сугестиите на родителите на децата со попреченост и правото кое се однесуваше само на самохраните родители, сега се проширува за сите родители кои не одат на работа, а чуваат дете со попреченост“, велат од Министерството за труд и социјална политика.
Од Министерството за труд и социјална политика велат дека надоместокот не е класична пензија, односно нема да се исплаќа преку Фондот за пензиско и инвалидско осигурување, туку од буџетот на Министерството бидејќи е социјално право.
МТСП сè уште нема фискални пресметки како тоа ќе се одрази на буџетот, бидејќи како што велат немаат точна бројка колку родители има што ги исполнуваат условите.
Е. БОЧВАРОСКА
