Пред крајот на завршните зборови на денешното судење за „Титаник 2“, обвинителката од СЈО Фатиме Фетаи рече дека ќе се осврне и на ставот на Врховниот суд да им ги забрани постапките, а кои се совпаѓаат со приговорот од обвинетиот Сашо Мијалков, кој за истото приговараше пред две недели, уште пред Врховниот суд да се замеша во работата на СЈО.

„Врховниот суд донел правен став кој е неправен и доведува до одговорност на врховните судии кои го донеле. Можеби пак ќе го извадат имунитетот од подрумот на Врховниот суд, ќе видиме. Во тој став го употребуваат и терминот овластен тужител. Не знам дали во градењето на тоа мислење во Врховниот суд учествувале и судии од Кривичниот оддел, но се надевам не, затоа што ако е така, работата е за жалење“, рече Фетаи.

Законите, продолжи таа, како овластен тужител го познаваат само јавниот обвинител и приватниот тужител.

„А специјалниот обвинител и јавните обвинители кои му помагаат не доаѓаат од фудбалската федерација, туку се јавни обвинители, а СЈО е јавно обвинителство“, додаде Фетаи.

• НЕ Е ЧУДО СУДИИТЕ ШТО ОТПАДНАА ОД ОБВИНЕНИЕТО ДА ПРОДОЛЖАТ ДА СУДАТ ПО ПАРТИСКА ДИРЕКТИВА, КАЖА ФЕТАИ НА ЗАВРШНИТЕ ЗБОРОВИ ЗА „ТИТАНИК 2“
• ПРЕДМЕТИТЕ НА СЈО ПОКРЕНАТИ ПО 30 ЈУНИ 2017, ВРХОВНИОТ СУД ЌЕ ГИ УКИНЕ АКО ДОЈДАТ ПО ЖАЛБА, МУ НАЈАВИ ВАНГЕЛОВСКИ НА СЈО

На крајот таа прецизираше во врска со приговорот на Мијалков дека предметот „Титаник 2“ е преземен од редовното обвинителство на 4.12.2015, а бомбите се преземени на 30.12 истата година. Поради тоа, како што кажа таа, обвинението за „Титаник 2“ е поднесено во законскиот рок од 18 месеци.

„Не е точно“, ѝ дофрли Мијалков од место.

Денеска, Фетаи ги даде завршните зборови за незаконското поништување на гласањето во Струмица на локалните избори 2013 што, според обвинението, било сторено по барање и под влијание на Мијалков врз Мендух Тачи, за тој со умисла да побара од членот на ДИК Бедредин Ибраими да им се придружи на Сашо Срцев, Елизабета Стефановска и Влатко Сајковски и да ја злоупотребат службената положба со гласање за приговорите на ВМРО-ДПМНЕ, со што поништиле чисто гласање во корист на тогашната владејачка партија, а на штета на СДСМ.

С. К. ДЕЛЕВСКА