Уставните судии негативно ја пречекаа иницијативата на осудениот на 18 години казна затвор Митко Чавков, за терористичко загрозување на уставниот поредок и безбедноста при нападот во Собранието на 27 април 2017, со која сакал да ја оспори амнестијата на дел од обвинетите, која не важеше за него.

Уште на почеток судијата-известител Владимир Стојановски кажа дека не може Уставниот суд да му кажува на Собранието, кое е надлежно да донесе закон за амнестија дали да амнестира.

„Собранието го овластува судот да амнестира, одредувајќи му за кои дела смее обвинето лице да го амнестира, а за кои не смее. Собранието не кажува кого судот да го амнестира, а кого не. Тоа си беше оставено на обвинителството и на судот“, кажа Стојановски.

Чавков ја поднел иницијативата зашто смета дека таа е селективна, бидејќи за исти кривични дела, според него, селективно била вршена амнестијата за организираниот напад на Собранието на 27 април 2017 година.

Од 33-ца обвинети, 15-мина беа амнестирани, меѓу нив и пратениците Крсто Мукоски и Сашо Василевски, кои ги отворија вратите на Собранието за да влезат насилниците. Амнестијата опфати и други обвинети или осудени лица во помали судски предмети околу настаните на 27 април.

С. К. ДЕЛЕВСКА