ОБВИНЕТ Д-Р ВЕЛО МАРКОВСКИ И УШТЕ 7 ЛИЦА ЗА НЕЗАКОНСКИ АРХЕОЛОШКИ ИСТРАЖУВАЊА И ШВЕРЦ НА АРТЕФАКТИ

    ОБВИНЕТ Д-Р ВЕЛО МАРКОВСКИ И УШТЕ 7 ЛИЦА ЗА НЕЗАКОНСКИ АРХЕОЛОШКИ ИСТРАЖУВАЊА И ШВЕРЦ НА АРТЕФАКТИИнфектологот Марковски ги чувал вредните артефакти, сопственост на Македонија, во својот стан, додека не се нашле купувачи за шверцување на аретафактите. (Фото: ТВ Стар)

    По повеќемесечна истражна постапка, Обвинителството за организиран криминал и корупција денеска до Основниот кривичен суд Скопје поднесе Обвинителен акт против осум лица за илегални археолошки истражувања за стекнување на личен профит, а меѓу обвинетите е и инфектологот д-р Вело Марковски. Во меѓувреме, Марковски стана член на раководството на ВМРО-ДПМНЕ.

    „Лицата се обвинети дека во текот на 2017 и 2018 година поединечно или заедно, без дозвола од надлежни органи, вршеле недозволени археолошки истражувања и ископувања на археолошки локалитети и локалитети со природни реткости на територијата на РС Македонија, пронајдените добра неовластено ги присвојувале и прикривале, а потоа добрата неовластено ги продавале на купувачи во земјава и во странство“. Објави ОЈО за организиран криминал.

    Имено, во наведениот период на територијата на Р.С. Македонија обвинетите Р. П, А. Б. и Ж. Р., со цел стекнување на противправна имотна корист, создале група за вршење на кривични дела поврзани со недозволени археолошки истражувања и ископувања, на која припадници станале обвинетите Вело Марковски и уште 4 лица.

    „Членовите на групата поединечно или заедно преземале криминални дејствија за остварување на точно определени цели, па така, обвинетите Р. П., А. Б., Ж. Р., В. М., Б. Д. и Ј. М. без дозвола од надлежни органи вршеле недозволени археолошки истражувања на археолошки локалитети и локалитети со природни реткости на територијата на Македонија. Тие меѓусебно разменувале сознанија за позиционираноста на овие локалитети и по нивно пронаоѓање, со неовластена употреба на метал – детектори и сонди, вршеле недозволени пребарувања. Со употреба на погодни алати, недозволено ги ископувале археолошките локалитети и локалитетите што содржат природни реткости, а пронајдените добра под привремена заштита, културни наследства и природни реткости со непроценлива вредност, сопственост на РС Македонија, неовластено ги присвојувале. Потоа артефактите ги прикривале на безбедни непознати локации и во домовите на обвинетиот е лекар Марковски, на И. Д. и А. Б., додека да најдат неовластени купувачи“.

    Откако ќе биле пронајдени купувачите од земјата и од странство, обвинетите им ги шверцувале овие значајни артефакти, кои се сопственост на државата. Купувачите добрата под привремена заштита, односно културно наследство и природните реткости со непроценлива вредност ги изнесувале надвор од државата, во странс. о, и со тоа трајно ги отуѓиле на штета на државата.

    Според Обвинителниот акт сите обвинети, тројца како организатори и петмина како припадници на групата сториле кривично дело „Злосторничко здружување“. Во зависност од дејствијата што ги сториле, на обвинетите им се ставаат на товар кривичните дела „Изнесување во странство на добра под привремена заштита или културно наследство или природни реткости”, „Присвојување на добра под привремена заштита или културно наследство или природни реткости”, „Оштетување или уништување на добра под привремена заштита или културно наследство или природни реткости“ и кривично дело „Прикривање“ .

    Карактеристично за овие групи освен што недозволено користат метал детектори, сонди и други погодни алатки за скенирање на длабочина на територијата која е цел на ископ, со себе недозволено држат и оружје, па така, дел од обвинетите сториле и кривично дело „Неовластено изработување, држење, посредување и тргување со оружје или распрскувачки материи.

    ​Обвинителството за организиран криминал денеска поднесе уште едно обвинение, против членот на Судскиот совет Зоран Теофиловски и против уште 6 лица за „Злоупотреба на службената положба и овластувањата“.

    Според обвинението, во периодот од август 2011 година до декември 2012 година, обвинетите Теофиловски како одговорно лице – Претседател на Тениско спортско здружение Љуботен Тетово и Ц. Н. како одговорно лице – Управител во правното лице Друштво за спортски активности Тениски Клуб Љуботен ДОО Тетово, со умисла ги потикнале обвинетите А. Н. како лице кое врши работи од јавен интерес и службените лица Џ. А., И. К., К. И. и И. Р. со искористување и неизвршување на нивната службена положба и овластување, со умисла да прибават значителна имотна корист за правното лице Друштво за спортски активности Тениски клуб Љуботен ДОО Тетово, а на штета на средствата на државата – сопственост на градежно земјиште, во вредост од 22.050.000 денари.

    С. К. ДЕЛЕВСКА

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира