По несреќата на 29 јануари, кога на „Партизанска“ во Скопје беше прегазена 22-годишната Фросина Кулакова од страна на 20-годишниот Васил Јованов, кој беше пијан и без возачка дозвола, полицијата ги засили сообраќајните контроли, и за 20 дена во месец февруари фати 1.510 возачи без дозвола. Вкупно, полицијата напишала 18.132 казни, од кои што најголем дел биле за надминување на дозволената брзина.

„Од почетоков на месецов заклучно со вчерашниот ден (20.02.) полициските службеници од сите осум сектори за внатрешни работи при БЈБ на МВР издале 18.132 платни налози на граѓани-учесници во сообраќајот за сторени прекршоци по основ на Законот за безбедност на сообраќајот на патиштата и Законот за возила. Најголем дел од тие непочитувања на сообраќајните правила и прописи се однесуваат на пречекорување на брзината на движење – 6.056, потоа непрописно паркирање – 4.213 и непоседување на возачка дозвола – 1.510“, соопштија од МВР.

Само вчера, полицајците напишале 864 казни, од кои што 273 биле за непочитување на брзината на движење. За управување возило без возачка дозвола вчера биле детектирани 58 прекршоци.