Уставниот суд на денешната седница изрече времена забрана за владината уредба со која се ограничуваше движењето на граѓаните постари од 67 години и од утре тие ќе можат да излегуваат од 5 до 19 часот, како и другите граѓани, а не од 5 до 12 напладне.

Уставниот суд изрече времена забрана и за ограничувањето за лицата помлади од 18 години. И за нив, полицискиот час ќе важи како и за останатите граѓани од 19 до 5 часот, место да смеат да излегуваат само од 12 до 19 часот.

Уставниот суд, покрај времената забрана за ограничување на движењето за овие две категории, поведе и постапка за тие ограничувања и на некоја од наредните седници ќе се гласа за уставноста на полицискиот час за малолетниците и пензионерите, за кој што мнозинството од уставните судии сметаат дека е дискриминаторски.

Денеска, Министерството за здравство регистрираше дваесет и девет нови случаи на КОВИД-19. Вкупно досега, во нашата земја вкупно дијагностицирани со КОВИД-19 се 1.723 лица, оздравени пациенти се 1.235, починати се 95, а активни случаи се 393.

С. К. ДЕЛЕВСКА