Владата го прифати предлогот на министерот за надворешни работи за отповикување на македонскиот амбасадор во Јапонија, по што, претседателот на државата го потпиша указот за отповикување, соопшти денеска од МНР.

Станува збор за амбасадорот Горан Цеков, за кого пратеникот на ВМРО-ДПМНЕ Антонијо Милошоски, како претседател на собраниската Комисија за надворешни работи, побара од министерот Бујар Османи да го отповика, бидејќи против него има поднесено претставки за мобинг и сексуално вознемирување од две жени.

Пред месец и пол, во парламентот, Милошоски кажа дека едната претставка е од македонска државјанка вработена во амбасадата, а друга од јапонска државјанка која соработувала со амбасадата.

„Согласно законските надлежности и интерните процедури, Комисиjата во рамки на Министерството за надворешни работи му препорача на министерот за надворешни работи, да ѝ предложи на Владата повлекување на досегашниот амбасадор на Република Северна Македонија во Јапонија, врз основа на член 3 од Уредбата за утврдување на работи кои се сметаат како незадоволителни резултати и работи со кои им се причинува штета на интересите на државата во работата на амбасадорот“, се вели во соопштението на МНР за отповикувањето.