Претседателот Стево Пендаровски им додели Орден за заслуги на Република Северна Македонија на Милица Стојанова, Милка Ефтимова и Стојна Вангеловска, додека Факултетот за драмски уметности, Интернационалниот фестивал на филмска камера „Браќа Манаки“ и Националната установа Турски театар го примија признанието Повелба на Република Северна Македонија.
Актерската дива Милица Стојанова е одликувана за нејзиниот фундаментален придонес во основањето на македонскиот театар, како и за развојот и афирмацијата на македонските театар и филм.
„Огромна благодарност. Огромна е честа што ми е укажана. Ова признание го примам во свое име, но и во име на моите колешки и колеги. Возбудата е голема“, кажа 89-годишната Стојанова.
Милка Ефтимова е наградена за исклучителниот и траен придонес во развојот на оперското пеење и за својата педагошка активност, а олимписката вицешампионка од 1988, Стојна Вангеловска, за нејзините врвни резултати во кошарката како играч и тренер.
„За мене, ова е чест и задоволство, но и мотив за натамошните активности. Чест е да се биде денеска овдека со овие силни и храбри жени, доајени во нивните професии. Тежок е патот кон успехот, полн е со предизвици“, изјави Вангеловска.
„Одликувања се аргумент дека пошироката заедница поседува референтни точки врз основа на коишто може да ги гради понатаму своите развојни политики во сите витални општествени сфери“, кажа Пендаровски.
