Пет лица се блокирани во куќа во светиниколското село Стоиманци каде денес изби пожар.

„Правиме напори луѓето да се извлечат, но поради огнот во селото тоа е многу тешко. Упатен е еден хеликоптер кој фрла вода околу куќата која сè уште не е во пламен за да може да се извлечат луѓето“, рече директорот на Центарот за управување со кризи Стојанче Ангелов.

Во моментов активни се 15 пожари, а како што кажа Ангелов повторно се побарани авиони од странство преку ЕУ механизмот за заштита и спасување.

„Топлото време и ветерот прават проблеми во воспоставување контрола врз пожарите. Апелирам до граѓаните кои живеат во овие полунапуштени села итно да се евакуираат ако слушнат дека во нивна близина има пожар, да не чекаат огнот да дојде до селото“, додаде Ангелов.

А. АНТЕВСКА