ПОТВРДЕНИ ДОЖИВОТНИТЕ КАЗНИ ЗА МАСАКРОТ КАЈ СМИЉКОВСКО ЕЗЕРО ВО 2012, КОСОВО МОЖЕ ДА ГИ ЕКСТРАДИРА ИЗБЕГАНИТЕ ДЕМИРИ И ИСМАИЛОВИЌ

    ПОТВРДЕНИ ДОЖИВОТНИТЕ КАЗНИ ЗА МАСАКРОТ КАЈ СМИЉКОВСКО ЕЗЕРО ВО 2012, КОСОВО МОЖЕ ДА ГИ ЕКСТРАДИРА ИЗБЕГАНИТЕ ДЕМИРИ И ИСМАИЛОВИЌОбвинението за „Монструм“ на повторениот судски процес го застапуваше обвинителката Фетаи која отпочеток до крајот доаѓаше во црнина. (Фото: СДК.МК)

    Петкратното убиство кај Смиљковско Езеро во 2012 година останува терористички акт, а Алил Демири, Африм Исмаиловиќ и Агим Исмаиловиќ ги убиле четирите момчиња на возраст од 18 до 21 година од населбата Радишани: Филип Славковски, Александар Наќевски, Цветанчо Ацковски и Кире Трпковски, како и Борче Стевковски, 45 години, од селото Црешево. Според објавената пресуда на сајтот на Апелација, жалбите на петтемина обвинети се одбиваат, се потврдуваат казните, од кои три се доживотна робија.

    Масакрот се случи на 12 април 2012 меѓу 19:30 и 22:30 часот. Обдукцијата врз убиените покажа дека во нив е пукано од три типа огнено оружје, зашто беа најдени чаури од три различни типа муниција.

    Судот им ги потврди доживотните затворски казни на обвинетите Алил Демири, Африм Исмаиловиќ и Агим Исмаиловиќ. По убиството, во Косово побегнаа Алил Демири и Африм Исмаиловиќ и сега се отвора прашањето дали сега кога заврши и повтореното судење за „Монструм“, конечно ќе ги екстрадираат во Македонија.

    Овие тројца сега се правосилно осудени на доживотен затвор за кривично дело Тероризам од член 394-б став 1 в.в. со член 22 од Кривичниот законик (КЗ).

    Се потврдува првостепената казна и на Хаки Азири за две кривични дела Помагање на сторител по извршено кривично дело од член 365 став 2 в.в. со став 1 од КЗ, кој за две дела доби по 5 години во единствена казна од 9 години затвор. И нему му се пресметува времето поминато во притвор, па бидејќи тој е 6,5 години притворен, од затворската казна му остануваат само околу 3 години за издржување.

    Апелациониот суд потврди дека шестообвинетиот Сами Љута се ослободува од обвинение.

    Второстепениот суд му ја потврди единствената казна од 15 години затвор на обвинетиот Фејзи Азири за две кривични дела Помагање на сторител по извршено кривично дело од член 365 став 3 в.в. со став 1 од КЗ. Од неа му се одбиваат 6 години кои ги помина во притвор за „Монструм“.

    „Монструм“ имаше две судења, откако во 2017 година Врховниот суд го врати овој случај на  почеток, овојпат кај СЈО. Обвинението го застапуваше обвинителката Фатиме Фетаи.

    С. К. ДЕЛЕВСКА

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира