Расходите во предложениот буџет за 2024 година се проектирани на 5,5 милијарди евра, што е за 5,8 отсто повеќе од 2023 година, кажа премиерот Димитар Ковачевски на прес-конференција во Владата. Приходите се проектирани на 5,04 милијарди евра, што е за 10 отсто повеќе од 2023 година, а дефицитот е предвидено да биде 545 милиони евра или 3,4 отсто од БДП, додаде премиерот.

Образложувајќи го предложениот буџет, Ковачевски рече дека се гарантира редовна исплата на платите, пензиите и на социјалната помош, како и сервисираше на обврските на државата кон кредиторите.

Во предложениот буџет, вели Ковачевски, има пари за покачување на платите во јавниот сектор, за редовното усогласување на пензиите и за повеќе финансиски средства за општините.

Ризици за реализација на буџетот се војната во Украина, конфликтот на Блискиот Исток и затегнатите финансиски услови на глобално ниво.
Проекциите се следната година да има раст на БДП од 3,4 отсто, а стапката на инфлација да биде 3,6 отсто.

Владата го усвои предложениот буџет и следен чекор е негово усвојување во Собранието.