„Сите во Министерството за внатрешни работи се вознемирени кога гледаат дека некој криминалец се прикривал со униформа“, рече денеска министерот Панче Тошковски ,одговарајќи на новинарско прашање за уапсениот Ангел Самараков, самостоен инспектор и припадник на Единицата за лично обезбедување на премиерот Христијан Мицкоски. Самараков беше фатен на паркинг пред хотел во Велес при обид да продаде тајни документи за 50.000 евра.
„Ова е еден од случаите каде МВР покажува дека неселективно се бори против криминалците во своите редови. Многу кривични пријави има против МВР. Одделот за внатрешна контрола во рамки на спроведување на истрагата известил Јавен обвинител, кој се согласил да бидат преземени дејствија истата вечер. Извршени се повеќе претреси кај полициски службеници и најдени се докази кон кривичното дело. Да им порачам на сите предавници на родот свој, дека неселективно и бескомпромисно ќе се бориме против истите. Македонското граѓани заслужуваат полиција која ќе ги штити, а не да ги рекетира“, рече Тошковски по јавната дебата по повод Неделата на пешаците што се одржа во Идризово.
Самараков, кој доби 30 дена притвор, е осомничен за кривичното дело Оддавање службена тајна, за кое што е предвидена затворска казна од најмалку една година. Истрагата ја води јавен обвинител од Специјализираното одделение за гонење на кривични дела сторени од лица со полициски овластувања и припадници на затворска полиција. Тој предложил до судија на претходна постапка при Основен кривичен суд Скопје на осомничениот да му определи мерка притвор во траење од 30 дена, кој предлог е прифатен од судот.
