Њујорчанецот Сол Вилијамс, 44 годишен рапер, поет, музичар,  борец за човекови права, со издадени книги, со светски настапи на поетски фестивали, со голема дискографија, па и филмографија, настапи на втората вечер на 15.Офф фест во МКЦ во Скопје.

Уметникот од целото срце набрзо по почетокот на концертот ја покажа својата активистичка природа симнувајќи се од сцената и настапувајќи меѓу публиката. Зборуваше, рапуваше, но и пееше во ритам на хип-хоп, хаус, денс, техно,  против сите влади, против сите режими, против сите религии, расизми, пееше во име на слабите, на угнетените, во име на слободата, демократијата, на идентитетот и едно време пееше дека од антика до денес живееме исто. „Во исти гомна сме“ рече, се подврати на сцената и надвор од стиховите додаде: „Смешен ви е споменикот“.

Сол го заврши концертот со нарација во која зборуваше дека сите се раѓаме некаде, без да имаме избор каде сме се родиле.

Вилијамс е на  турнејата на која го промовира последниот свој албум (Martyr Loser King) во кој зборува во име на измислен лик, рудар од Бурунди кој станува хакер и крева револуции низ целиот свет. Концертот на Вилјамс е проследен со коментари и ангажирани текстови на видеобим.

Концертот кој официјално поради финалето на Лигата на шампиони се презакажа и започна по 23 часот, наместо во 20.30, продолжи со диџеј Батида од Португалија.